पिंपरी-चिंचवडमध्ये पावसाचे थैमान; रस्ते जलमय, वाहतुकीवर मोठा परिणाम
निर्भीड पत्रकार न्यूज नेटवर्क
प्रतिनिधी, स्वप्नील इंगळे
दि.०३.०७.२०२६
पिंपरी-चिंचवड- शहरात झालेल्या मुसळधार पावसामुळे जनजीवन विस्कळीत झाले असून अनेक प्रमुख रस्ते पाण्याखाली गेले आहेत. सखल भागांमध्ये मोठ्या प्रमाणात पाणी साचल्याने वाहनचालकांना मोठ्या अडचणींचा सामना करावा लागत आहे. काही ठिकाणी वाहतूक संथ गतीने सुरू असून नागरिकांची मोठी गैरसोय झाली.
सततच्या पावसामुळे नाले तुडुंब भरल्याने अनेक भागांत पावसाचे पाणी रस्त्यावर आले. वाहनांच्या लांबच लांब रांगा लागल्या असून कार्यालयीन वेळेत नागरिकांना वाहतूक कोंडीचा सामना करावा लागला. प्रशासनाकडून पाणी उपसण्याचे आणि वाहतूक सुरळीत करण्याचे काम युद्धपातळीवर सुरू आहे.
हवामान विभागाने पुढील काही तासांतही जोरदार पावसाची शक्यता व्यक्त केली असून नागरिकांनी आवश्यक कामाशिवाय घराबाहेर पडू नये, तसेच पाणी साचलेल्या भागातून जाताना विशेष काळजी घ्यावी, असे आवाहन करण्यात आले आहे.
दरम्यान, महानगरपालिका, आपत्ती व्यवस्थापन विभाग आणि अग्निशमन दल सतर्क असून कोणतीही आपत्कालीन परिस्थिती उद्भवल्यास तातडीने मदत उपलब्ध करून देण्यात येत असल्याची माहिती प्रशासनाने दिली आहे.
